update

終於有時間整理下個blog，開學加上要重新適應新blog，仲有set private，舊blog back up等等⋯⋯，今日終於有d時間攪攪佢。

舊blog已經back up 備份，唔可以再留言，但仍然有d blog友仲未能重遇，如果呢度一set 左private，大家就不能再相遇，所以我開左個新blog，set 左private，如果已經通知左我email address，invitation已經發出，有任何問題，可以通知我，而其他blog友如想繼續交流，也可以留個eamil address俾我，等我add你。

兩公婆拍拖睇演唱會

8月31日（六）

早前收到信用咭公司的宣傳，知道今日有一場紀念陳百強的演唱會，只要上網登記，之後响指定日期內，每次簽賬滿＄500就可以有一次抽獎機會，雖則我不是陳百強的粉絲，但不需付出分毫，就有機會睇演唱會，再加上未開學，而且係星期六，有姐姐幫我睇女，何樂而不為呢？

結果真係俾我抽中左，所以今晚就同老公拍拖去

我地先去東涌食晚飯，之後再去博覽館睇演唱會

聽番D舊歌，真係幾好聽，開頭仲諗住會早D走，點知一路睇到散場，返到屋企成12點幾，雖然夜，但過了一個美好的晚上。

私人網誌邀請

諗左兩日，決定將呢個blog轉做不公開，請各位繼續有興趣互相交流的網友，如果不介意，可以在此留個email address給我，但如果大家不想太公開自己的email address，亦可以將你的email address send 去我呢個account : sfungwl@gmail.com，此為臨時account專為收集大家的email address而設，完成呢個使命之後，將會光榮引退。

請各位繼續有興趣互相交流的網友，用呢兩個方法留個email address俾我，好讓我日後可以send inviation 給大家，而此網誌將繼續公開至9月30日，由10月1日開始，網誌將會全面私有化。

研究中........

仍然研究緊點樣用呢個新blog，基本上簡單的寫blog同upload相係無問題，而最大的問題係如何設權限，之前yahoo blog可以好簡單逐篇設權限，但呢度唔可以，要做就係成個blog做，而且仲要send email invitation，即係要問人攞email address，都幾麻煩，又唔想太公開講email address，又唔知邊個想睇，仍在研究如何可以簡單d。

我知有d blog 友會建立兩個blog，一個公開，一個唔公開，但我唔想同時間要handle兩個blog，所以我最後只會有一個blog，不過要諗下點攪。

迪士尼magic show

8月25日（日）

今日去睇迪士尼magic show,响九龍灣展貿,相比之前的show,呢個無咁好睇，開初有d悶場，好彩之後好d,再加上公主出現，即刻變得好睇。

5日4夜九州熱辣辣之旅 - Day 5

8月22日（四）

最後一天的旅程,今日下午1:55機回港,兩位小姐非常好瞓

早上還有一個行程 - 睇企鵝

一向以為企鵝只係生活响冰天雪地的地方,所以仲以為展館會有強勁的冷氣,但原來企鵝都有好多種,今日睇呢種係生活响熱帶地方,真係孤陋寡聞.

之前去北海道的時候已經睇過企鵝,所以沒有甚麼特別,不過呢度就可以摸企鵝同近距離影相

睇完企鵝,5日的行程亦完滿結束,準備出機場返香港,回程兩位小姐都好合作

4點多回到香港,結束5日4夜之旅

第一次去完旅行返到屋企仲係天光,之前已經同工人姐姐講定會回家食晚飯,美味的晚餐

今次唔係買左好多野,一來知道自己收入少左,二來兩姐妹的衣物實在太多,多到都著唔切,所以一路都提醒自己要忍手,唔好買咁多,都算成功啦.

仲有一D食得嘅, 超甜可以生食的白肉粟米同差不多季尾的超甜多汁白桃

5日4夜九州熱辣辣之旅 - Day 4

8月21日（三）

原以為今日會係最輕鬆的一天,但結果相反,係最辛苦的一天至真.

今日早上食飽早餐,就向我地的目的地進發,今日景點只有一個 - 豪斯登堡

旅行團安排了入住豪斯登堡內的酒店,早上11點左右到達,因為未可安排上房,所以先放下行李,跟住就入園.

今日辛苦主要係因為,全日在園內,天氣實在太熱,成38度,又要趕緊去玩大家想玩的遊戲,以往幾日都仲可以有d時間响車上休息,但今日就要直踩全日,真係呢.........

講番正題,入園後首先去左玩一個關於one piece的小型機動遊戲,坐下船仔,睇下電視,勝在有冷氣

之後就搭shuttle bus去到碼頭,坐真正的'千陽號',上船之前,先來個午餐,one piece造型午餐,

食飽飽夠鐘上船,雖然只係20分鐘船程,但呢20分鐘係非常忙碌,因為要响船上走來走去同d character影相,相信表哥仔就最開心,因為此為他近期最愛的卡通,至於我兩個女,雖然唔知呢套係乜東東,但都一樣興奮,係咁要影相.

落船之後,去左一間可以影3d相的展館,影左好相

之後差不多可以4點,可以返酒店check-in,決定先check-in梳洗一下,才再戰樂園

出發前,導遊通知,暑假期間,園內開左一個水上樂園可以玩水,所以叫我地帶定泳衣,咁炎熱的天氣,此活動實在係最適合不過,因此休息一陣就再次入園去水上樂園,其實係一個臨時搭建,有各式各樣滑水梯的地方,不過只要有得玩水,班細路就已經好開心,玩到6點左右,又再返酒店梳洗.

因為之前跟導遊定了一隻蟹及一些魚生,所以梳洗過後,我地先消滅左呢d美食,之後再入園搵食,謠謠跟左表哥仔地去玩一個關於未來的遊戲,好似話係幾年前日本係世博展出的項目,而我同妹妹就帶左公公婆婆去醫肚,老人家一定要食飽先得,食食下飯突然落大雨,好彩走的時候停左,但就不停行雷,因為我地無帶雨具,所以也不敢行太耐,放棄了影夜景,而實在也不想再行,因為真係好攰,行到酒店與樂園的接駁口,因為開始有瓦遮頭,所以就入shop作最後衝刺.

今日真係好攰,但明日要回港了,所以都要收拾行李.

5日4夜九州熱辣辣之旅 - Day 3

8月20日（二）

今日晨早5點幾,老公就起左身,因為佢要去影日出相,酒店面向的別府灣係東面,聽導遊講,日出係好靚,再加上昨晚浸溫泉時,見到溫泉門口,提供左今日的日出時間,所以老公特地早起去睇/影日出,其實我都已經醒左,如果唔係要睇住兩個女,我諗我會跟埋佢去,之後睇番d相,真係好靚,老公話整個日出過程,只係10分鐘左右,睇住太陽由水平線慢慢升起,實在值得早起去欣賞.

老公番房之後,又係時候梳洗食早餐,今早兩位小姐開始有d賴床,唔多願起身,不過叫多兩叫都ok嘅,食飽早餐又出發,今日上午會先玩別府附近景點.

第一站: 海地獄/血地獄

跟據導遊所講,場內有一塊蓮葉可以承托一個小孩,入到場都見到有介紹,本來妹妹可以一試,不過原來有指定時間,時間唔啱,無得玩呀.

第二站:金錀湖/湯布院

出發之前,知道湯布院有一間蛋糕店頗有名氣,不過天氣實在太熱,行兩行兩姐妹又想食雪糕,等得佢地食雪糕,又要去洗手間,時間無多,最後放棄了,這就是跟團的唔好處,不過另一方面,炎熱的天氣下,可以一跳上旅遊車舒舒服服,又是另一個好處

妹妹不愧係爸爸的好model

第三站:九重夢吊橋

呢度,雖然天氣好熱好曬,但從山谷中吹來陣陣涼風都幾涼快,但膽小的我,行左一小段吊橋,那種搖晃的感覺(其實只係好輕微)令我有點兒不安,再加上拖住妹妹就更加不安,所以最後我同妹妹都係行番轉頭等大隊,無行完條吊橋.

行完吊橋,上午的行程亦已經完成,食過午飯後,會坐約兩小時車去福岡,所以呢程車最好的活動一定係睡午覺.

大約4點幾到達福岡天神地下街,來呢度的節目一定係shopping,第一時間去百貨公司睇下有無Sanrio,好開心俾我地搵到,一支箭咁沖上去,兩位小姐就開心囉,盡情地揀,滿載而歸呀,之後行去爸爸想去的Bic Camera,行左陣,買左d野,距離集合時間已經差不多,快步去藥房買埋想買的野,時間剛剛好.

食埋晚飯,回酒店,今晚又係住溫泉酒店,返到酒店已經9點幾,但兩位小姐都仲話要浸溫泉,似乎佢地真係好鍾意,梗係啦,佢地當玩水嘛,係小朋友都鍾意玩水嫁啦,結果差不多11點先上床瞓覺.