5日4夜九州熱辣辣之旅 - Day 2

8月19日（一）

昨晚大家都瞓得好好,一早起身食過早餐就出發.

第一站:長崎奇趣登山電梯及觀景台

老實講完全唔覺得有幾特別,只係森美小儀的節目介紹過,而且又在酒店後面,相對方便,不過上到山上望番落黎,景色也不錯,至少有些少涼風,不至太悶熱

第二站:平和紀念公園

到此一遊,落車影張相,即走,太陽的熱力實在太可怕.

不過在此卻發生了小意外,上車前先帶姐妹倆去洗手間,家姐已經可以自己入一格,自己攪掂,妹妹又想學家姐,見日本的洗手間都乾淨,就俾佢試下,我响門廁格門口等佢,點知妹妹去完之後,唔夠力開番門鎖,之前次次同我一齊去的時候,都係佢自己開門,都無問題,偏偏今次自己去就開唔到,好彩妹妹無喊,如果唔係我仲亂,又好彩廁格間上面係可以互通而且不是太高,不知從何來的小宇宙,立刻由隔離廁格爬過去幫佢開門,最後有驚無險,不過自始之後,妹妹唔敢再自己一個入廁格,就算係都唔敢閂門。

午餐:今日食鰻魚飯,都幾好食,不過兩位小姐不愛鰻魚,只食飯,仲食晒成盒飯,皆因d飯唔係白飯,係用鰻魚汁蒸的飯,好好味.

第三站:柳川水鄉坐船仔

原本係一件好有詩意的事,坐住船仔,船夫一邊揸船,一邊唱下歌,雖然唔明佢唱乜,不過烈日當空,37度高溫下,實在乜野mood都無晒,仲要曬住來遊水鄉,兩個女全程只係成日問,幾時上岸呀?

好不容易,終於可以上岸,立刻跳上冷氣車,舒服晒.

第四站:鳥栖outlet

outlet當然係shopping的時候,可以有兩小時左右行,兩位小姐的衣服實在太多,所以唯有忍手,結果一人只係買左一盒Lego,再加少少髮飾,老公買左條牛仔褲.

是日尾站:別府灣溫泉酒店

酒店面向一望無際的別府灣,景色非常靚,影左少少相,

跟住就去食晚飯,晚飯食酒店buffet,都算多選擇,仲有兒童counter,小朋友就最開心,飯後當然就係溫泉時間,估唔到兩位小姐咁鍾意浸溫泉,浸完溫泉水,即刻跳去冰水,都唔覺凍,仲好鬼開心,不停咁兩個池走來走去,浸完溫泉,食埋雪糕,休息了.

5日4夜九州熱辣辣之旅 - Day 1

8月18日（日）

今日晨早7:55直飛九州長崎空港,早上5:40要到達機場集合,所以凌晨4:00就要起身,可能驚唔知醒,所以成晚都瞓得唔好,11點幾上床,瞓下醒下,都唔知有無瞓到一個鐘,凌晨4:00,唔洗鬧鐘,都識自動彈起身,兩位小姐都好合作,快快手自己攪掂,一家四口4:30已經準備好,可以出門口,不過因為我地約左的士5:00,所以還有充裕的時間.

5:30左右到達機場,會合埋其他團友,先去食早餐,不過太早的關係,無乜胃口,再攪下左攪下右,去到登機閘口已經7點幾,今日第一次在北衛星登機,有少少大鄉里feel.

因為包機係細機的關係,沒有機上娛樂提供,好彩一早預左,自備ipad,3個多小時的航程,食下瞓下玩下,好快就到.

落機等齊人

先去機場附近食午餐,食飽飽,向第一個景點出發,九十九島海上遊

天氣太好太熱,首先當然要食雪糕降下溫,不過幫助不大,實在太熱喇,基本上呢5日的溫度都係維持36,37度,熱到個人無晒心機,慶幸小朋友係唔怕熱嫁,只怕無得玩.

等左一陣,就上船開始我地海上遊,好彩船艙有冷氣,我就當然安座船艙啦,不過有無窮精力的小朋友就通船走,老公就走左上甲板影風景,各自各精彩,50分鐘左右的航船程,話咁快就完.

上車向下一個地方出發,這是跟團的其中一個好處,點到點,上車即瞓,到站自然有人會叫你起身,

呢程車兩個女瞓得好舒服,不過我同老公就瞓唔著,老公仲影左好多沿途風光

一個鐘多d,到達長崎車站的shopping mall,可以有一小段shopping時間,入左超市買水果,之後食埋晚飯就回酒店

5日4夜九州熱辣辣之旅 - 前言

幾年一度家族大旅行又出發,今年選址九州,主要係要去豪斯登堡搵海賊王(表哥仔至愛),又要浸溫泉(公公婆婆至愛).

一行12人,當然係跟團,去日本,首選東瀛遊,可能係之前幾次跟佢的經驗都幾好,於5月尾左右,細妹已經去搵料,發現東瀛遊暑假期間同港龍租左隻包機俾自己公司的旅行團,而且價錢合理,大人$7,399, 小童$6,699,行程也符合我地的要求,就此拍板.

再左夾右夾,有要睇下請唔請到假,人多最麻煩就係夾日子,最後終於決定8月18日出發,22日回程.

新Blog試用

Yahoo 要 close, 所以要地方搬,希望以前D舊blog可以順利搬晒過來啦。